Serikali yaombwa kuchangia shughuli za kitamaduni

Na; Faraji Feruz

Mtwara

Wito umetolewa kwa serikali kuona umuhimu wa kutenga bajeti kwa ajili ya shughuli za kiutamaduni hapa nchini, ili kusaidia kuendeleza, kuhifadhi, kuthibitisha na kuhimiza mila na desturi zinazoendelezwa katika baadhi ya maeneo hapa nchini.

Mkurugenzi mwenza na mratibu wa makuya na mahusiano ya umma, kutoka taasisi isiyokuwa ya kiserikali ya ADEA, Phillipo Lulale ametoa wito huo, mbele ya waandishi wa habari, wakati akitambulisha tamasha la nne la ngoma za asili, maarufu MAKUYA mwaka 2012.

mesema kuwa ni muhimu kwa serikali kuwa na bajeti yenye msingi wa kuendeleza tamaduni za mtanzania, kutokana na mabadiliko ya sayansi na teknolojia yanayoendelea kutokea katika bara zima la Afrika na dunia kwa ujumla, na hivyo kuhatarisha kutoweka kwa urithi huu katika muda mfupi ujao.

Lulale amesema kuwa dhumuni kubwa la tamasha hilo la MAKUYA, ni kujenga uelewa kwa jamii ya ndani na ile ya kimataifa juu ya utajiri na urithi wa ngoma za asili, kukuza utamaduni katika mkoa wa mtwara, kusaidia utunzaji na uendelezaji wa ngoma za asili na kuukumbusha umma kwa ujumla uwepo wa utamaduni wa ngoma za asili kusini mwa Tanzania.

Nae mratibu wa tamasha la MAKUYA, toka taasisi ya ADEA, Dominic Chonde amesema kuwa tamasha hilo litakalofanyika katika uwanja wa Nangwanda Sijaona mjini mtwara, kuanzia novemba 17 hadi 18, litahusisha vikundi 15 vya ngoma ya sili kutoka manispaa na halmashauri zote za mkoa wa mtwara, huku likijumuisha makabila makuu matatu ya wamakonde, wamakua na wayao.

Amesema kuwa tamasha la mwaka huu, ambalo ni la nne, tangu kuanzishwa rasmi mwaka 2008, litagharimu kiasi cha shilingi milioni 60, na kufadhiliwa na uablozi wa Finland, British Gas, Wentworth Afrika Foundation, na Odjell Drilling, ambapo shughuli mbalimbali zikiwemo ngoma za asili, maonesho ya wazi ya mafundi wa jadi, mabanda ya kuonesha vifaa vya asili na michezo mbalimbali ya jadi zitafanyika katika tamasha hilo.

source: the chief